فد يوم من الايام سألت حبوبتي گلتلها جده جدي شلون چان مدبرها ويه اربع نسوان التفتت عليه وگالت جدك زلمه حيد وسبع مو مثل زلم هذا الوكت وتباوع عليه گتلها شلون گالت جده احنا اربع نسوان وماگادراتله خلي اسولفلك وحده من سوالفه .
چنا بالعماره بالريف وزارعين عنبوري (رز عنبر ) وگبل مو مثل هسة سوگ قريب وشتريد تشتري چان البگال يجي ابلم (زورق) ونطيه شلب ونأخذ منه مخضر مااطولك السالفة چان بوكتها بصل شحيح ومايتحصل واحنا بوكت حصاد اجاني جدك گالي ام ذياب راح اگلچ بشغلة بس مو تگولين گتله گول سرك ابير گال هذا راس بصل حصلته وگلت ماتستاهلة غير ام ذياب ولاتجيبين طاري الشريچاتچ المهم بدينه نحصد وهو يحصد ويصيح (انتي العزيزة يم راس البصل) وانا جدتك ذبيت فلك وصرت مكينة حصاد (حاصدة ميكانيكية) وشريچاتي صارن مثلي انا گلت غارن مني لان انا الزغيرة المهم خلصنا شغل مال اسبوع بيوم واحد ..من رجعنا للبيت تعاركنه انا وام حسين علمود الجهال گالت خايبة انتي اشايفه روحچ تره ابو حسين مايبدي (مايفضل)عليه وحده منچن واليوم من چنا نحصد اطاني هذا راس البصل وطول النهار يهوس انتي العزيزة يم راس البصل وهذا كله عليه وتجي ام ناصر وام ياسر وهم نفس الشي هم كل وحده منطيها راس بصل وگايللها لاتگولين واحنه مكيفات كل وحده عبالها عليها ...التفتت عليه وعادت نفس كلمتها المعهودة هاي الزلم يجده مو زلم هذا الوكت وحده ومامدبرها
شتگولون بحچي جدتي واحد يگدر يدبرها ويه أربعة بهذا الوكت مثل جدي .